Tuesday, May 6, 2014

Júróförðun nr. 1

Ég fór úr náttbuxunum seinni partinn í dag og í betri gallann til að horfa á Eurovision í einni af nokkuð mörgum lærdómspásum í dag. Mér fannst það kjörið tækifæri til að prófa nýju Makeup Geek augnskuggana mína. Ég eeeelska þá! Svo pigmentaðir og svoo ódýrir! Keypti fjóra: Peach Smoothie, Creme Brulée, Cocoa Bear og Cinderella. Notaði þá alla í þetta lúkk. Peach smoothie yfir allt, creme brulée í crease-ið, cocoa bear til að dekkja ennþá meira í creasið og aðeins á ytri hluta augnlokanna og svo cinderella á innri ca 2/3 augnloksins. Svo notaði ég L'Oreal Super Slim eyelinerinn og L'Oreal million lashes maskara. Á húðinni er ég með Rimmel Match Perfection, sólarpúður frá Make Up Store og Coralista kinnalit frá Benefit. Á vörunum er varaliturinn Syrup frá Mac.



Nokkrar freknur farnar að láta sjá sig


Freknunærmynd



Gleðilegt Eurovision!! xo


Kara

Thursday, May 1, 2014

Hollur heimagerður ís

Nú fyrst held ég að bragðlaukarnir mínir séu orðnir fullþroskaðir. Ég borða nefnilega hnetusmjör núna, viti menn! OG snickers! OOOG peanut m&m. Já, undur og stórmerki gerast.
Þetta blogg átti að vera tilbúð fyrir langalöngu en myndavélin mín var með mótþróa svo hér er það..blogg nr. 2 þetta kvöldið!

Ég hef nokkrum sinnum gert mér "ís" úr frosnum bönunum og ákvað að gera svoleiðis um daginn eftir að ég mundi að ég ætti banana í frystinum - en svo, 40 gigtar- og bæklunarfyrirlestrum seinna, fannst mér bara að ég þyrfti að bæta einhverju smá gúmmelaði í þetta til viðbótar.

Frosinn banani (bananar? fer eftir magamáli hvers og eins) + hnetusmjör + smá kakó í blandara/matvinnsluvél



Nei þetta lítur ekki út eins og ís..en ekki gefast upp (og måske bætið við mjólkurdreitli ef þetta er allof þurrt - bara smá dropa!)

ÍS!!

oooooomnomnom!

Nammnamm ís og glósur



Gleðilega ísgerð!







Nýtt og nýlegt

Góðan og fallegan daginn elsku þið!

Ég biðst afsökunar á fjarveru minni, hef bara ekki beint verið í förðunar-stuði svona í prófunum. Mig langaði samt að skella í eina litla færslu og sýna ykkur nokkra hluti sem ég hef sankað að mér síðustu vikur. Það líður sjaldan langt á milli þess sem ég kaupi mér eitthvað nýtt í safnið. Ég veit ég átti að vera í snyrtivörubanni fram á sumar..en hvern er ég að reyna að blekkja? Ég er hömlulaus. Naglalökk eru venjulega ekki á innkaupalistanum en ég er bara búin að lenda óvart með nefið ofan í 50% naglalakka-útsölu körfur í apótekum borgarinnar. Kemur fyrir besta fólk!


1. Bourjois Rouge Edition Velvet 06 Pink Pong
2. Mac Pro Longwear Concealer
3. Maybelline Color Show Rose Chic
4. L'Oreal 819 Sublime Platine
5. L'Oreal 833 Wasabi Hint
6. Depend nr. 362
7. Depend nr. 347

Ég var spenntust fyrir Bourjois varalitnum sem ég keypti í dag, en ég rakst á hann í Hagkaupum í dag mér til mikillar ánægu eftir að hafa séð tvo uppáhalds youtube bjútíbloggarana mína dásama þá undanfarið! Keypti litinn Pink Pong. Þetta kemur út eins og gloss en þornar með mattri/velvet dásamlega fallegri silkimjúkri áferð. Hér sjáiði hvernig liturinn lítur út á mér:



Myndavélin pikkar ekki alveg upp hversu mikið fallega bleikur hann er - ekki svona rauðbleikur eins og á myndinni..samt mjög fallegur. Finnst ekki ósennilegt að fleiri litir rati í safnið á næstunni. Næst á dagskrá er fallega rauði liturinn Hot Pepper. 



Mig vantaði nýtt rakakrem svo ég keypti mér Nordic Moisture frá Garniere. Hlakka til að prófa það, hef aldrei prófað vörur frá Garniere áður. 
Ég kippi oft með mér í Body Shop litlum kremdollum. Þær eru rosa sniðugar oooog ódýrar. Bæði sniðugt til að prófa ný krem án þess að borga morðfjár fyrir krem sem hentar þér svo kannski ekki. Líka tilvalið að taka með sér í ferðalög! Fíla bæði kremin mjög vel. Annað er frískandi rakakrem með E-vítamíni og hitt er Aloe næturkrem. Mér finnst gott að hafa tvö rakakrem í gangi. Fínt fyrir húðina að breyta aðeins til.


Þennan maskara keypti ég á miðnæturopnun í Kringlunni á 50% aflslætti. Ég hef notað hann mjög mikið og finnst hann mjög góður. Lengir vel og þykkir við rót augnháranna. Eina sem ég get kvartað yfir er burstinn. Ég er ekki hrifin af burstahárunum og ekkert sérstaklega hrifin af löguninni, en formúlan finnst mér frábær!
Mig vantaði svo nýjan felt tip eyeliner fyrir svona morgna þar sem maður er á síðustu stundu en vill aðeins sjæna sig. Þessi er tilvalinn í það. Lögunin á pennanum er frábær og auðvelt að nota hann en ég er ekki alveg nógu hrifin af formúlunni. Innst í augnkrókunum finnst mér liturinn smitast niður í neðri vatnslínuna þar sem ég vil alls ekki hafa neinn lit. Kaupi þennan sennilega ekki aftur þar sem það er nóg úrval til af svona pennum.

Ég keypti líka tóma pallettu í Mac og depot-aði í gær nokkra augnskugga. Þeir eru afar glaðir með nýja heimilið sitt. Að depot-a augnskugga er efni í heila færslu í viðbót sem ég skal skrifa með glöðu geði ef einhver hefur áhuga á að vita hvernig það er gert, endilega látið mig vita hvort þið viljið sjá svoleiðis :)


Þá hef ég formlega hafið störf á ný eftir pásu. Eftir prófin hef ég agalega lítið að gera og kem því vonandi til með að koma með nýtt blogg daglega eða annan hvorn dag. 

Góðar stundir! xo

Kara

Tuesday, April 15, 2014

Sleek á Íslandi!

Loksins, loksins verða Sleek vörurnar fáanlegar á Íslandi! Sem eru ekki endilega góðar fréttir fyrir veskið mitt - en mjög góðar fyrir sálina mína! Vörurnar verða fáanlegar innan skamms á haustfjord.is . Mér skilst að allar vörurnar séu á undir 4000 kr og augnskuggapalletturnar með 12 augnskuggum koma til með að kosta 2390 og varalitirnir 1490. Ég hef prófað nokkrar vörur frá Sleek og ég eeelska þær! Frábært úrval, ótrúlega vandaðar vörur og fallegir litir. Hvet ykkur til að fylgjast með á facebook síðunni hennar Heiðdísar , Haustfjörð Makeup og skrá ykkur á póstlistann til að fá nýjustu fréttir.

Talandi um mega ódýrar en góðar snyrtivörur, þá keypti ég mér 4 augnskugga frá Make Up Geek. Var búin að vera mjög spennt að prófa og bíð nú eftir sendingunni sem fór af stað í dag. Keypti mér litina Peach Smoothie, Cocoa Bear, Cinderella og Creme Brulée. Ég er svona 98,7% viss um að ég muni kaupa mér fleiri liti. Mögulega alla..ef ég missi mig. Keypti bara svona "pans" til að setja inní nýju fínu tómu Mac pallettuna mína þar sem ég get loksins haft alla augnskuggana mína saman á einum stað. Eins og ein stór hamingjusöm fjölskylda. Mjög falleg fjölskylda. Á eftir a depot-a 4 Mac augnskugga, búin að kynna mér á youtube hvernig það er gert (svona..) - vonandi er það svona auðvelt.

Happy shopping!


Wednesday, April 9, 2014

Út fyrir þægindarammann


Þessi færsla er aðeins persónulegri og töluvert lengri en ég er vön að skrifa en það er nefnilega þannig að þegar maður fer út að hlaupa þá eru allskonar hugsanir sem þjóta um og ég ákvað að mínar ættu heima hér þar sem allir sem hafa áhuga á því geta lesið..

Um daginn var dagur sjúkraþjálfunar haldinn hátíðlegur. Þar voru saman komnir gamlir, nýir og verðandi sjúkraþjálfarar til að hlusta á aðra sjúkraþjálfara og fleira sniðugt fólk tala um allskonar sniðuga hluti. Einn af þeim fyrirlestrum sem mér fannst áhugaverðastur var fyrirlesturinn hans Sigga Ragga um hvað þarf til að ná árangri. Þar talaði hann um að til þess að ná árangri og til að bæta sig og verða framúrskarandi í því sem maður gerir þarf maður að setja sér markmið. Markmiðasetning er svo mikilvæg. Ég ætla ekki að fara nákvæmlega í þá sálma, þar sem þetta blogg gæti því orðið ca. 5 blaðsíðna ritgerð. Markmiðasetning er nefnilega svona 1/3 af öllu sem ég hef lært í skólanum þetta árið. Allavega þurfa þau að vera SMART (google it...). Maður þarf að hafa ástríðu fyrir því sem maður gerir, vera tilbúinn að leggja á sig þetta “auka” umfram hina sem eru að reyna að gera það sama og þú og síðast en ekki síst þarf maður að fara út fyrir þægindarammann sinn! Það er nefnilega svoleiðis sem maður bætir sig. Sama hvað það er sem maður vill gera.

Nú ætla ég ekkert að ljúga að ykkur – mér finnst drepleiðinlegt að fara út að hlaupa. Reyndar ætti þessi setning að vera í þátíð, því fyrir u.þ.b. ári síðan fannst mér það allra leiðinlegasta sem hægt var að gera. Ég skiiiildi ekki fólk sem hljóp fleiri tugi kílómetra sér til skemmtunar. Svo þykist ég alltaf ætla að byrja að hlaupa. Ég ætla ekki einu sinni að segja ykkur hversu oft ég hef haldið því fram að ég ætli að hlaupa 10 km í Reykjavíkurmaraþoninu. Oft sko. En hversu oft hef ég hlaupið 10 km? Ekki nokkurn tímann! Svo hlunkaðist ég af og til út að hlaupa (skokka...ekki hlaupa) þegar sólin skein og lullaði þess á milli á brettinu í WC á milli þess sem ég dansaði zumba, lyfti lóðum, bjórdósum, búðarpokum og nammipokum. Svo til að gera langa sögu stutta missti ég nokkur kíló, hætti að reyna að hlaupa því mér fannst það leiðinlegt, fann mér hreyfingu sem ég elskaði og leið bara rosa vel. Svo byrjaði ég í BootCamp. Oft langar mig bara ekkert á æfingu, tilhugsunin um brennandi læri og brennandi lungu er oft ekkert kósí þegar maður liggur uppí sófa með teppi en VÁ hvað það er alltaf gaman þegar maður er mættur. Það er svo ótrúlega auðvelt að halda bara áfram að kúra. Það er líka svo ótrúlega auðvelt að horfa bara á einn Friends í viðbót. Mitt “innra samtal” (köruletipúkinn á vinstri og köruræktardurgurinn á hægri) hefur þróast síðasta árið úr því að vera sú sem horfir á 3 friends í viðbót í það að drullast upp úr sófanum og gera eitthvað.

Að byrja í BootCamp var stórt skref út fyrir minn þægindaramma. Samblanda af hlaupi (og ÚTIhlaupi guð hjálpi mér), upphífingum (dauði og djöfull), bjarnargöngu, hnúahnébeygjum, ketilbjöllum og allskonar vitleysu hefur ekki verið minn tebolli en it grows on you og verður svo asnalega skemmtilegt. Svo byrjaði ég að æfa byrjendablak hjá HK. Ég hef aldrei æft boltaíþróttir alla mína ævi og hef forðast þær eins og heitan eldinn hreinlega vegna þess að ég er glötuð í þeim. Ég var líka glötuð í blaki þegar ég byrjaði. Núna ná uppgjafirnar mínar næææstum því allaf yfir netið!

Og nú...til að tengja allt þetta bull við punktinn sem ég er að reyna að koma á framfæri hérna...þá er ég búin að fara tvisvar út að hlaupa í þessum mánuði. Fyrsta skiptið fór ég stuttan hring sem lengdist óvart því ég bara gat allt í einu hlaupið lengur. Næst fór ég sama hring á miklu betri tíma og betra tempoi. Allt í rétta átt. Bekkjarsystur mínar ætla að hlaupa í Reykjavíkurmaraþoninu og ég ætla með þeim 10 km. Jáb, I went there. Í þetta skiptið mun ég standa við það því að munurinn á þessu skipti og öllum hinum sem ég hef lofað sjálfri mér þessu er sú að ég veit að ég get það. Ég veit líka að nú er það ekki hausinn sem mun stoppa mig, því hann er á svo mun betri stað en hann hefur áður verið. Þegar maður setur sér markmið er svo mikilvægt að taka inn í myndina hindranir sem geta orðið á vegi manns á leiðinni hvernig maður ætlar að vera undirbúinn fyrir að yfirstíga þær. Mín helsta hindrun hafa verið svona hugsanir: “æj það er svo kalt”,  “vá það er örugglega að byrja að rigna” eða “ég fer kannski á morgun bara”. Nú hef ég fundið mína leið til að komast yfir þessar hindranir. “Hættu þessu væli og drullastu á æfingu, þú verður SVO glöð þegar þú ert búin!” er orðin mín leið til að komast yfir þær. Auðvitað er þetta ekkert svona einfalt og hentar ekki öllum. Ég hef verið heillengi að vinna í því að styrkja mig bæði líkamlega og ekki síst andlega og hver og einn verður að finna sína leið til að komast í gegnum hvaða hindranir það eru sem halda aftur af þeim á leiðinni að sínu markmiði. Hvort sem markmiðið er að fara út að hlaupa, ekki borða nammi í viku, hækka meðaleinkunnina sína eða bara að líða vel í dag.

Þessi færsla átti ekkert að vera svona dramatísk..ég hef bara alltaf verið voða dramatísk – foreldrar mínir geta vottað það. Mér fannst bara svo merkilegt að ég, sem hef ekki hlunkast meira en lítinn hring í hverfinu mínu um hásumar hafi tekið meðvitaða ákvörðun um að fara út að hlaupa í myrkri og rigningu og í alvörunni fundist það skemmtilegt! Pínulítið hænuskref í átt að 10 kílómetrunum, en svo lengi sem það er í rétta átt þá er ég glöð! Litlu hlutirnir gleðja mann mest

Takk fyrir að lesa bullið í mér, þið sem entust alla leið hingað! 
Nú læt ég sennilega ekki í mér heyra fyrr en einhverntímann í næstu viku því nú eru verkleg próf og þá er lögheimili mitt í Stapa, HÍ og þar er enginn tími fyrir blogg eða snyrtidót

Góðar stundir
-Kara